Kanadada Atatürkün adı elə siyahıya yazıldı ki... | Səfirlik məsələ ilə bağlı hərəkətə keçdi

Kanadada bir liseyin şagirdlərinə verilən tapşırıq böyük qalmaqala yol açıb.

Türk mediası xəbər verir ki, şagirdlərə təqdim olunan “Bir diktatoru seç və təsvir et” mövzusunda verilmiş tapşırıqda Türkiyə Cümhuriyyətinin qurucusu Mustafa Kamal Atatürkün adı diktatorlar siyahısına salınıb. Siyahıda Benito Mussolini, Səddam Hüseyn və Fulhensio Batista kimi dünyaca tanınmış avtoritar liderlərin adları da yer alıb.

Bu hadisə başda Türkiyə ictimaiyyəti olmaqla Kanadadakı türk icmasında da ciddi narahatlıq yaradıb. Hadisəyə Türkiyənin Kanadadakı səfirliyi də dərhal reaksiya verərək məsələni yaxından izləməyə başladığını bildirib.

Türkiyənin Kanadadakı səfiri Can Dizdar məsələ ilə bağlı rəsmi açıqlama verib. O, Atatürkün belə bir siyahıya salınmasını “qəbuledilməz” adlandıraraq bunları deyib:

“Atatürkümüzlə bu cür rəftar edilməsi qəbuledilməzdir. Təəssüf ki, belə tək-tük hadisələr baş verə bilər. Tələbəmizin ailəsinə bu məsələ ilə bağlı göstərdikləri həssaslığa görə təşəkkür edirəm. Ağır səhvi düzəltmək və bir daha yaşanmaması üçün bütün lazımi addımları atacağıq. Məsələni diqqətlə izləyəcəyik”.

Hazırda hadisənin baş verdiyi təhsil müəssisəsi ilə əlaqə saxlanıldığı, məsələ ilə bağlı rəsmi izahat tələb olunduğu bildirilir.