Kiyevə zərbələr gücləndi: azərbaycanlılar necə yaşayır? - “Sağ qalmaq istəyirik, xeyli adam ölür...”

Son vaxtlar Ukraynada, xüsusilə də paytaxt Kiyevdə yanacaqdoldurma məntəqələrinə və ümumilikdə enerji infrastrukturuna endirilən hava zərbələri ölkədə ciddi gərginliyə səbəb olub.

Yanacağın qiymətində kəskin artım, yanacaq çatışmazlığı, eləcə də enerji təchizatında yaranan məhdudiyyətlər vəziyyəti daha da çətinləşdirib.

Hazırda Kiyevdə hava zərbələri nəticəsində zədələnmiş və fəaliyyətini dayandırmış yanacaqdoldurma məntəqələrinə tez-tez rast gəlmək mümkündür.

Azərbaycan diasporunun nümayəndəsi Sərxan Vidadiyev bildirib ki, Ukraynada yaşayan azərbaycanlı sahibkarlar da yaranmış vəziyyətlə əlaqədar ciddi problemlərlə üzləşirlər:

“Bunlardan ən əsası yanacaqdoldurma məntəqələrində yaranan növbələr, yanacağın qiymətinin bahalaşması, enerji təchizatında yaranan problemlər, elektrik enerjisinin kəsilməsi və istiliyin olmamasıdır. Bütün bunlar bir çox iş yerlərinin bağlanmasına səbəb olub”.

Ukrayna Ali Radasının deputatı Sergey Naqornyak isə ölkədəki vəziyyətin hazırda kifayət qədər mürəkkəb olduğunu deyib:

“Təxminən 100 yanacaqdoldurma stansiyası ruslar tərəfindən dağıdılıb. Son bir neçə həftə ərzində Kiyev sakinlərinin hərəkət etdiyi, insanların işə, məktəbə və uşaq bağçalarına getdiyi körpülərə hücumların şahidi olduq. Ruslar günün günorta çağı körpülərdə hərəkət edən avtomobillərə zərbələr endirdilər.

Lakin buna baxmayaraq, ukraynalılar Azərbaycan kimi dostların dəstəyi sayəsində müqavimət göstərirlər. Dəstəyə görə minnətdarıq və biz mütləq dayanacağıq”.