Kolumbiyada terror aktı: 14 nəfər həlak oldu - Baku TV

Kolumbiyanın cənub-qərbindəki Kauka departamentində törədilən partlayış nəticəsində ölənlərin sayı 14 nəfərə çatıb.

Regionun qubernatoru Oktavio Qusman bu barədə "X" sosial şəbəkəsində bildirib.

Onun sözlərinə görə, həlak olanlardan 5-i azyaşlıdır. 38 nəfərdən çox insan isə yaralanıb.

Qubernator hadisəni mülki şəxslərə qarşı hücum adlandırıb və partlayıcı qurğunun avtomobil yolunda böyük izdiham zamanı partladıldığını, humanitar fəlakətə səbəb olduğunu qeyd edib.

O həmçinin regionda zorakılıqların kəskin şəkildə artdığını vurğulayaraq daha bir neçə yaşayış məntəqəsində hücumların və toqquşmaların baş verdiyini diqqətə çatdırıb.

Region rəhbəri mərkəzi hakimiyyəti təcili tədbirlər görməyə və müdafiə nazirini təhlükəsizlik səylərini əlaqələndirmək üçün bölgəyə göndərməyə çağırıb.

"Caracol Radio" nəşrinin məlumatına görə, hücuma görə məsuliyyəti 2016-cı il sülh müqaviləsini imzalamayan keçmiş FARC təşkilatının üzvləri ilə əlaqəli olan "Xayme Martines" qruplaşması daşıyır.