Məşhurların ölümündəki əlaqə səs-küy yaratdı | Həkim hər şeyi danışdı

Məlum olduğu kimi, Türkiyənin Qara dəniz musiqisinin nəhəng səsi Volkan Konak Kiprdə bayram konserti zamanı infarkt keçirərək 58 yaşında dünyasını dəyişib.

6 ay əvvəl səhnədə halı pisləşərək xəstəxanaya yerləşdirilən sənətçi Metin Arolat da 52 yaşında dünyasını dəyişib. Digər bir sənət adamı Zeki Müren də 1996-cı ildə TRT İzmir Televiziyasında onun üçün təşkil edilən mərasimdə infarkt keçirərək dünyasını dəyişib.

Səhnədə oxşar taleyi paylaşaraq həyatını itirən sənətçilərin ardınca bu qəfil ölümlərin arxasında nələr dayanır sualı ağıla gəlir.

Artan adrenalin səviyyəsi ürək dərəcəsini artıraraq ani infarktlara səbəb ola bilər. Başqa bir səbəb yuxusuzluq və həddindən artıq yorğunluq ola bilər.

Türkiyəli kardioloq həkim İsmayıl Ateş səhnədə infarkt keçirmə səbəbləri və alınması lazım olan tədbirlərdən danışıb.

Onun sözlərinə görə, bu riskin əsas səbəbləri arasında güclü stres və həyəcandır:

“Səhnə çıxışları böyük fiziki və emosional təzyiq yaradır. Uzun davam edən məşqlər və gecə konsertləri yuxu rejimini poza və ürək sağlamlığına mənfi təsir göstərə bilər. Qeyri-müntəzəm və qeyri-sağlam qidalanma da ürəyi yoran mühüm amillərdəndir.

Qapalı və sıx işıqlandırılan mühitlər də bu riskə səbəb ola bilər. Səhnə işıqları və havasız konsert məkanları susuzluğa və oksigen çatışmazlığına səbəb ola bilər. Bu isə ürəyi daha çox yükləyir”.

Bundan əlavə, səhnə çıxışından öncə qəbul edilən enerji içkiləri, həddindən artıq kofein və fastfud kimi hazır qidalar ürək damarlarını gərginləşdirərək infarkt riskini artırır.

Mütəxəssis bildirib ki, COVID-19 keçirmiş şəxslərdə ürək damarlarında qan laxtalanması, iltihablanma və ani ürək krizi riski arta bilər:

“Bu vəziyyət COVID-19 xəstəliyinin özünə bağlı bir haldır. Tətbiq olunan peyvəndlərə dair isə vətəndaşların ağlında çoxlu suallar yaranıb. Bu barədə dəqiq bir məlumat olmamaqla yanaşı, COVID-19 sonrası bəzi peyvəndlərin nadir hallarda ürək iltihabı kimi yan təsirlərə səbəb ola biləcəyi bildirilir”.

Həkim gizli ürək xəstəliklərinin və hipertoniyanın uzun müddət fərq edilmədən irəliləyə biləcəyini və stresli vəziyyətlərdə ani krizlərə səbəb ola biləcəyini vurğulayıb.