Mirzoyan Rusiya hərbçilərinin Ermənistandan çıxarılmasından danışdı | Üzərimizdəki öhdəlikləri...

Gündəlikdə Rusiya hərbi bazalarının Ermənistan ərazisində mövcud olması ilə bağlı sazişə yenidən baxılmasından söhbət gedə bilməz.

Bunu Ermənistanın xarici işlər naziri Ararat Mirzoyan 2024-cü ilin yekunlarına həsr olunmuş mətbuat konfransında bildirib.

O həmçinin qeyd edib ki, Ermənistanın Türkiyə ilə sərhədində rus sərhədçilərinin yenidən yer alması, eləcə də Gümrü şəhərində Rusiyaya məxsus 102-ci hərbi bazasının mövcudluğu ilə bağlı sazişə yenidən baxılmayacaq.

“Rusiya hərbçiləri sözügedən istiqamətdə müvəqqəti idilər. Ermənistan öz müvafiq qurumlarını yaradıb. Təkbaşına öz üzərinə düşən öhdəlikləri icra edə bilir. Vaxtı çatanda biz Rusiya sərhədçilərinə təşəkkür etdik və dedik ki, İrəvan Beynəlxalq Hava Limanındakı işləri özümüz təmin edə bilərik.

Daha sonra isə İran sərhədindəki keçid məntəqəsinə də nəzarəti öz ordumuza həvalə etdik. Bu isə o deməkdir ki, bizim İrana yüksək etimad və güvənimiz var. Türkiyə ilə də aramızda açıq sərhəd və etimad olarsa, biz bu məsələni onlarla da müzakirə etməyə hazırıq”, – deyə Ermənistanın xarici işlər naziri bildirib.