Nadir təbiət hadisəsi hamını heyrətə gətirəcək

Noyabrın 30-dək Leonid meteor yağışı aktiv olacaq.

Bu barədə Bakı Dövlət Universitetinin Fizika fakültəsinin Astrofizika kafedrasından məlumat verilib.

Bildirilib ki, meteor yağışının pik dövrü 17–18 noyabr gecəsi gözlənilir. Orta aktivlik dövründə saatda təxminən 15–20 meteor müşahidə edilə bilər.

Leonidlər əsrlərdir astronomları və müşahidəçiləri heyran edən ən möhtəşəm meteor yağışlarından biridir. Adını isə Şir bürcündən götürür.

Hər 33 ildən bir Yer kometin yeni buraxdığı hissəcik buludunun içindən keçəndə leonidlər "meteor fırtınası" yarada bilir. Bu zaman saatda minlərlə meteor müşahidə olunur.

Leonidlərin meteorları çox sürətli olur – təxminən 71 km/saniyə. Bu onları göydə ən sürətli meteor yağışlarından birinə çevirir. Qeyd edilib ki, onların işıq izləri uzunmüddətli olur.

Leonidlərin ən möhtəşəm tərəfi isə onların tarixi fırtınalarıdır. 1833-cü ildə müşahidəçilər səmada təxminən 100 000 meteor görmüşdülər. Bu hadisə "meteor yağışı" anlayışını dünyaya tanıdan ən güclü təbiət hadisələrindən biri olub.