Pakistanın paytaxtı İslamabadda məhkəmə binasının yaxınlığında partlayış baş verib

Pakistanın paytaxtı İslamabadda məhkəmə binasının yaxınlığında partlayış baş verib. Azı 12 nəfər ölüb, 27 xəsarətalan var.

Pakistanın Baş naziri Şahbaz Şərif yaralananlara lazımi tibbi yardımın göstərilməsini tapşırıb.

Məlumatı ölkənin daxili işlər naziri Möhsün Nəqəvi təsdiqləyib. Onun sözlərinə görə, terrorçu məhkəmə binasına daxil olmağa cəhd edib, amma bunu bacarmayacağını görəndə polis maşınına hücum edib və özünü partladıb.

Hazırda terrorçunun şəxsiyyətinin təsdiqlənməsi istiqamətində ekspertiza aparılır.

"Məhkəmə binasına hücumun arxasında dayananlar müəyyənləşəcək. Hazırda isə bir neçə versiya var. Əgər başqa ölkədən kiminsə əli varsa, bu, bağışlanmayacaq. Sübutlar yaxın zamanlarda təqdim olunacaq", ‒ deyə Möhsün Nəqəvi bildirib.

Qeyd edək ki, partlayışdan sonra məhkəmə binası boşaldılıb, ölənlər arasında vəkillər də var. İlkin məlumata görə, partlayışı Hindistanın dəstəklədiyi və Əfqanıstan talibləri ilə əlaqəli Fitnə Əl Xəvaric terror qruplaşması törədib.