Puldan bezən varlıların ölkəsi | "Lüksün vətəni"ndə sadə insanlar necə yaşayır? - ORALARDA NECƏDİR?

“Oralarda necədir?” rubrikasının yeni buraxılışı yayımlanıb.

Bu dəfə Bakıdan 3565 kilometr uzaqda, Liquriya dənizinin sahillərində yerləşən dünyanın ən kiçik və ən gözəl ölkələrindən biri – varlıların sevimli ölkəsi olan Monakodan bəhs edilib.

Monakonun köklü sakinlərinə “Moneqask” deyirlər. Onların sayı çox deyil, cəmi 6 min nəfərdir. Qalanları isə buraya köçən varlılardır.

Buranın yerli əhalisi, yəni moneqasklı xanımlar üçün dünyaya uşaq gətirmək havayıdır. Bundan əlavə, dövlət yeni doğulmuş körpə üçün hər bir moneqasklı ailəyə 1990 manat pul verir. Səbəb isə yerli əhalinin kökünün kəsilməməsidir.

Monakoda bir universitet fəaliyyət göstərir. Maraqlı fakültələrdən biri “Luxury Management”, yəni “Lüksün idarəolunması” fakültəsidir. Monako həmişə “lüksün vətəni” sayılıb. Elə bu səbəbdən də belə bir ixtisasa məhz Monako Universitetində rast gəlmək mümkündür. Burada bahalı əşyalarla işləməyi və onlarla davranmağı bacaran insanlara ehtiyac var.

Monakoda kazino, restoran və hotel biznesində işləyənlər daha çoxdur. Ölkədə minimal maaş 1600 avrodur, bu isə 3183 manata bərabərdir. Hətta küçə təmizliyi ilə məşğul olanlar belə bundan aşağı maaş almırlar. Aşpazlar isə ən azı 3000 avro, yəni 5970 manat qazanırlar.

Maraqlıdır ki, Monakoda bahalı, super brend geyimlər geyinənlər çoxdur və kimsə sadə geyinibsə, bir çoxları ona yuxarıdan aşağı baxa bilər.