Rəisinin düşdüyü qəza ilə bağlı yeni iddia | İlkin nəticələr açıqlandı

İran Silahlı Qüvvələrinin Baş Qərargahı Prezident İbrahim Rəisinin helikopterinin qəzaya uğraması ilə bağlı aparılan araşdırmanın ilkin nəticələrini açıqlayıb.

Araşdırmaların yekununda məlum olub ki, nəqliyyat vasitəsinin üzərində güllə izlərinə rast gəlinməyib.

Bundan əlavə, helikopter yalnız dağla toqquşduqdan sonra alovlanmağa başlayıb. Məlumata görə, bu müddətdə pilot digər 2 pilotla əlaqə saxlaya bilib.

Onu da qeyd edək ki, helikopter müəyyən edilmiş marşrutla uçub və qəzaya bir dəqiqə yarım qalanadək orada qalıb. Lakin ərazinin mürəkkəbliyi, duman və temperaturun aşağı olması səbəbindən kəşfiyyat əməliyyatı gecə saatlarına qədər uzanıb və demək olar ki, bütün gecə boyu davam edib. Daha sonra səhər saatlarında İran PUA-larının köməyi ilə qəzanın dəqiq yeri aşkar edilib.

Məlumat üçün bildirək ki, uçuşun idarə olunması mərkəzi ilə heyət arasında aparılan danışıqlarda heç bir şübhəli hal qeydə alınmayıb. Hazırda qəza ilə bağlı məqamların böyük bir hissəsi açıqlanıb, lakin bir sıra faktların və detalların araşdırılması üçün daha çox vaxt lazım olduğu bildirilib.

Xatırladaq ki, mayın 19-da İran rəsmilərini daşıyan helikopter Şərqi Azərbaycan vilayətinin şimalında qəzaya uğrayıb. İran Prezidenti İbrahim Rəisi, ölkənin xarici işlər naziri Hüseyn Əmir Abdullahian, Təbrizin imam cüməsi Məhəmmədəli Əl-Haşim, Şərqi Azərbaycan vilayətinin valisi Malik Rəhməti qəza nəticəsində həlak olublar.