Rəisinin xatirəsi Şərqi Azərbaycanda belə əbədiləşdirildi

İranın mərhum prezidenti İbrahim Rəisinin helikopterinin qəzaya uğradığı və ümumilikdə 9 nəfərin həlak olduğu Şərqi Azərbaycan əyalətinin Vərzəqan mahalının Dizmar bölgəsinin adı dəyişdirilərək “Şəhid cümhur” qoyulub.

Bu barədə İran mediası məlumat yayıb.

Ölkənin Ətraf Mühitin Mühafizəsi İdarəsinin rəhbəri Əli Səlaciqə jurnalistlərə açıqlamasında bunun İbrahim Rəisinin xatirəsini əbədiləşdirmək məqsədilə edildiyini deyib.

Qeyd edək ki, Dizmar qoruq ərazisi Şərqi Azərbaycan əyalətinin şimalında – Xudafərin, Vərzəqan və Culfa rayonlarının qoruq zonasında yerləşən dağlıq və meşəlik ərazidir.

Xatırladaq ki, İran Prezidenti İbrahim Rəisi ilə yanaşı, xarici işlər naziri Hüseyn Əmir Abdullahian, Şərqi Azərbaycan valisi Malik Rəhməti, Təbrizin imam cüməsi Məhəmmədəli Əl-Haşim və digərləri mayın 19-da Vərzəqanda baş verən helikopter qəzası nəticəsində həlak olublar.