Rusiya bu yolla diqqəti Ukraynadan yayındırmağa çalışır

“Estoniya Baltik dənizində hava məkanının müdafiəsi üçün NATO müttəfiqlərindən əlavə yardım istəməyi planlaşdırır. Çünki Alyansın Şərqi Avropadan olan üzvləri Rusiyanın bir ay ərzində üçüncü dəfə hava məkanını pozmasına reaksiya vermək niyyətindədir”.

Bu sözlər “Bloomberg”də yayımlanan yazıda qeyd olunub.

Rəsmi Tallin bunu Rusiyanın Avropa və NATO-nun qətiyyətini yoxlamaq cəhdləri kimi şərh edib. BMT-də bununla bağlı təcili iclas nəzərdə tutulub.

Bununla yanaşı, Estoniya müttəfiqlərlə birgə məsləhətləşmələri nəzərdə tutan NATO-nun 4-cü maddəsini tətbiq edib. Yazıda qeyd olunub ki, Rusiya bu yolla NATO-nun diqqətini Ukraynadan yayındırmağa çalışır.

Digər məsələ ABŞ-nin buna necə reaksiya verəcəyidir.

Estoniyanın Baş naziri Kristen Mixal bildirib ki, Rusiyanın təyyarələri hava məkanını daha tez tərk edə bilərdi, amma qəsdən gec çıxdılar.

“NATO müttəfiqlərimizlə məsləhətləşmələrdə bunun təkrarlanacağı halda hansı addımı atacağımızı dəqiqləşdirəcəyik”, – deyə Kristen Mixal qeyd edib.

Rusiya isə bütün ittihamları rədd edir. Hətta Kremlin sözçüsü Dmitri Peskov sentyabrın 19-da Rusiyaya məxsus üç “MiQ-31”in Estoniyanın hava məkanını 12 dəqiqə ərzində pozması ilə bağlı yayılan informasiyanı yalan adlandırıb. Çünki Tallin buna dair sübutları Moskvaya təqdim etməyib. Onun fikrincə, Estoniya gərginliyi artırmağa çalışır.