Rusiya ordusunun yüksəkrütbəli zabiti həlak oldu | Sui-qəsdin arxasında kim durur? - Baku TV

Moskva vilayətinin Balaşixa şəhərində BMW markalı avtomobil partladılıb, hadisə nəticəsində nəqliyyat vasitəsinin sürücüsü həyatını itirib.

Rusiya “Telegram” kanallarının yaydığı məlumata görə, avtomobilin partlaması nəticəsində yüksəkrütbəli rusiyalı hərbçi həlak olub. Şəxsiyyəti açıqlanmayan həmin şəxs general-leytenant rütbəsində olub.

Qeyd edək ki, hadisə iyunun 9-da yerli saatla 05:30 radələrində Balaşixanın Aviatorlar mikrorayonunda, Koldunov küçəsində baş verib. Sürücü “BMW X3” markalı avtomobilinə əyləşərək dayanacaqdan hərəkətə başladığı an güclü partlayış baş verib. Sürücü aldığı çoxsaylı ağır xəsarətlərdən hadisə yerindəcə dünyasını dəyişib.

Rusiya İstintaq Komitəsi faktı təsdiqləyərək hadisə ilə bağlı cinayət işinin açıldığını bəyan edib. İlkin araşdırmalara görə, partlayış trotil ekvivalentində 300–400 qram gücündə olan partlayıcı qurğu vasitəsilə törədilib. Hadisə ilə bağlı bir neçə versiya irəli sürülür. Partlayıcı qurğunun sürücü sükan arxasına əyləşəndən bir neçə dəqiqə sonra uzaqdan idarəetmə ilə işə salındığı ehtimal olunur.

Məlumata görə, bombanın sürücü oturacağının altına yerləşdirildiyi bildirilir. Başqa bir versiyada isə qurğunun maşının arxa hissəsinə qoyulduğu və partlayışdan dərhal sonra baqaj və arxa oturacaqlarda yanğın başladığı qeyd edilir. Həlak olan sürücünün 62 yaşının olduğu bildirilir. O, sözügedən avtomobili 1 il 8 ay əvvəl satın alıbmış. Hazırda hadisə yerində istintaq qrupu işləyir.