Rusiya qüvvələri diplomatik korpusun binasından 200-250 metr məsafəni vurub - Baku TV

İyulun 19-na keçən gecə Rusiya Ordusu Kiyevə və ətraf bölgələrə raket zərbələri endirib.

Kiyev Hərbi Administrasiyasının məlumatına görə, hücum nəticəsində bir nəfər həlak olub, doqquz nəfər yaralanıb. Şəhərin müxtəlif yerlərində yanğınlar baş verib.

Medianın yaydığı məlumata əsasən, endirilən zərbələrdən biri Azərbaycanın Ukraynadakı səfirliyinə yaxın ərazilərə düşüb. Səfirliyin inzibati binasından 200–250 metr məsafədə dağıntı və yanğın baş verib. Səfirlik binasına ziyan dəyməsi ilə bağlı dəqiq məlumat yoxdur.

Hücum nəticəsində paytaxtda ard-arda güclü partlayışlar baş verib. Ukrayna Hərbi Hava Qüvvələri ballistik raket təhlükəsi barədə xəbərdarlıq edib.

Kiyev meri Vitali Kliçko “Telegram” kanalında bildirib ki, hücum nəticəsində yataqxanada, yaşayış binasında və supermarketdə yanğın baş verib.

Onun sözlərinə görə, zərbə zamanı bir neçə qeyri-yaşayış binası və anbar dağıdılıb, şəhərin müxtəlif rayonlarında avtomobillər və ofis binaları da alovlanıb.