“Rusiya yanacaqlarına qayıtmaq strateji səhv olardı” | Ursula fon der Leyen

"Avropa enerji qiymətlərinin kəskin artımını yumşaltmaq üçün yenidən Rusiyanın fosil yanacaqlarına qayıtsa, bu, strateji səhv olar".

Bu fikirləri Avropa Komissiyasının prezidenti Ursula fon der Leyen bildirib.

"Münaqişənin başlanğıcından bəri qazın qiyməti 50%, neftin qiyməti isə 27% artıb. Bunu avro ilə ifadə etsək, müharibənin cəmi 10 günü artıq Avropa vergi ödəyicilərinə fosil yanacaq idxalı əlavə 3 milyard avroya başa gəlib. Bu bizim asılılığımızın qiymətidir. Fakt budur ki, bizim yerli enerji mənbələrimiz var: bərpa olunan enerji və nüvə enerjisi. Son 10 gün ərzində onların qiymətləri dəyişməz qalıb", – deyə o bildirib.

ABŞ-İsrail ilə İran arasında müharibə fonunda xam neft qiymətlərinin sürətlə artmasını məhdudlaşdırmaq üçün Beynəlxalq Enerji Agentliyi tarixində ən böyük neft ehtiyatı buraxılışını təklif edib. Bu barədə "The Wall Street Journal" məlumat yayıb.

Qəzetin məlumatına görə, bu buraxılış 2022-ci ildə Rusiyanın Ukraynaya genişmiqyaslı hücumu zamanı agentliyə üzv ölkələrin bazara çıxardığı 182 milyon barel neftdən daha çox olacaq. G7 enerji nazirləri strateji neft ehtiyatlarının buraxılması ilə bağlı razılığa gəlməsələr də, martın 10-da yaydıqları bəyanatda bu ideyanı prinsip etibarilə dəstəklədiklərini bildiriblər.