Rusiyada yer yerindən oynadı | 8.7 ballıq zəlzələ ölkəni belə dağıtdı

İyulun 29-dan 30-na keçən gecə Bakı vaxtı ilə 03:24-də Sakit okeanda Kamçatka yaxınlığında 8,7 bal gücündə zəlzələ baş verib.

Daha sonra 50-dən çox afterşok qeydə alınıb, onların bir neçəsi hiss olunacaq qədər güclü olub.

Təkanların episentri Petropavlovsk-Kamçatskdan 161 kilometr şərqdə, 32 kilometr dərinlikdə yerləşib. Bu, 1952-ci ildən bəri regionda baş verən ən güclü zəlzələdir.

Təcili tibbi yardım xidmətləri tam gücü ilə işləyir, vəziyyət nəzarət altındadır. Ərazidə insanların təhlükəsizliyinin təmin edilməsi, normal həyatın bərpası üçün bütün zəruri tədbirlər görülür.

Sunami təhlükəsi elan edilib, dörd metrə qədər hündürlükdə dalğalar qeydə alınıb. Rusiya və qonşu Yaponiyanın hakimiyyət orqanları sakinləri sahil zonasını tərk etməyə çağırıblar. Artıq bir neçə nəfər xəsarət alıb.

Qeyd edək ki, zəlzələ nəticəsində Kuril adalarında 2700 nəfər təhlükəsiz ərazilərə təxliyə olunub. Şimali Kuril rayonunda isə zəlzələ və sunami səbəbindən fövqəladə vəziyyət rejimi elan edilib.