Sankt-Peterburqda biznesmeni qaçıran banda tutuldu

Sankt-Peterburqda bir iş adamını qaçıran və "Zenit" klubunun futbolçusu Andrey Mostovoyu qaçırmağa cəhd edən bir qrup cinayətkar saxlanılıb.

Xarici media xəbər verir ki, polis cinayət işi açıb.

Hadisə 26 oktyabr axşamı baş verib. Şəhərin Vyazovaya küçəsində bir qrup kişi Dövlət Dumasının deputatı Vyaçeslav Makarovun kürəkəni, iş adamı Sergey Sereginə hücum edib. Hücum edənlər kişini zorla "Land Cruiser"ə mindirib, qandallayıb və silah gücü ilə 10 milyon rubl tələb ediblər.

İş adamı bildirib ki, həyat yoldaşı məbləğin bir hissəsini – 2,5 milyon rublu eyni küçədəki həyətdə verə bilər. Oğurlayanlar razılaşıblar, lakin sonda yalnız 210 000 rubl alıblar və sonra kişini buraxıblar.

Hücumda iştirak edən bütün şəxslər daha sonra saxlanılıb. İstintaq müəyyən edib ki, eyni qrup əvvəllər "Zenit"in və Rusiya milli komandasının futbolçusu Andrey Mostovoyu qaçırmağa cəhd edib, lakin idmançı qaçmağı bacarıb.

Banda üzvlərinə adam oğurluğu və soyğunçuluq maddələri ilə cinayət işləri açılıb. Saxlanılanlar ifadə verir və polis cinayətin mümkün törədicilərini müəyyən edir.