Suriya vətəndaşı Türkiyədə faciə törətdi | Ölənlər və yaralılar var

Türkiyədə əcnəbi vətəndaş naməlum səbəbdən beş nəfəri öldürüb, iki nəfəri yaralayıb, sonra intihar edib.

Hadisə Qaziantepin Şahinbəy rayonunun Üçoklar, Barak və Vətən məhəllələrində baş verib.

İddiaya görə, psixoloji problemləri olan Mustafa adlı Suriya vətəndaşı əvvəlcə bərbərxanada bir nəfəri, daha sonra evdə dörd nəfəri tapança ilə atəş açaraq öldürüb, iki nəfəri isə yaralayıb.

Qətli törətməkdə şübhəli bilinən şəxs hadisə yerindən qaçıb. Polis qrupları tərəfindən təqib edildiyini görən şübhəli öz başına atəş açaraq həyatına son qoyub.

Hadisə nəticəsində xəsarətalanlar müalicə olunmaq üçün müxtəlif xəstəxanalara aparılıb. Həyatını itirən və xarici ölkə vətəndaşları olduğu təsbit edilən qurbanların cəsədləri şəxsiyyətlərinin tam müəyyən edilməsi üçün Qaziantep Ədliyyəsinin Tibb Morquna aparılıb.