Tarixi körpü dağıldı, bir çox ailə köməksiz vəziyyətdə qaldı

Pakistanın cənub-qərbində yerləşən Bəlucistan əyalətində güclü yağışlar daşqınlara yol açıb.

Nəticədə yerli sakinlərin tarixi adlandırdığı Tarkha körpüsü dağılıb, bir çox ailə isə köməksiz vəziyyətdə qalıb.

Yayılan görüntülərdə sel sularının evlərin arasından keçdiyi, avtomobillərin su altında qaldığı və zədələnmiş körpünün vəziyyəti əks olunub. Su ilə dolmuş yollarda nəqliyyatın hərəkəti iflic olub.

Pakistanın Milli Fövqəladə Əməliyyatlar Mərkəzi martın 31-dən aprelin 5-dək ölkə üzrə güclü yağış və tufanlarla bağlı xəbərdarlıq edib. Xüsusilə Paxtunxva və Bəlucistan bölgələrində daşqın riski yüksək qiymətləndirilir.

Rəsmi məlumatlara görə, martın 25-dən bəri ölkənin şimal-qərbində yağışlarla əlaqəli hadisələr nəticəsində azı 25 nəfər həlak olub, 77 nəfər isə xəsarətlər alıb.

Səlahiyyətli qurumlar daha intensiv yağışların gözlənildiyini bildirərək yardım tədbirlərinin sürətləndirilməsinə çağırır.