Trampın çıxışından sonra Əl-Faşiri işğal edən general silahı yerə qoydu

“Beynəlxalq səylərə, başda ABŞ Prezidenti Donald Trampın, eləcə də dörd tərəfdaş ölkənin, Afrika İttifaqının və Hökumətlərarası İnkişaf Təşkilatının səylərinə cavab olaraq, mən 3 ay müddətinə humanitar atəşkəs elan edirəm. Bu müddətdə döyüş və hərbi əməliyyatlar dayandırılsın”.

Bu sözləri Sudanın Çevik Dəstək Qüvvələrinin rəhbəri Məhəmməd Həmdan Daqalo deyib.

Beləliklə, general Daqalo Sudanın silahlı qüvvələri ilə münaqişədə dərhal qüvvəyə minən üç aylıq humanitar atəşkəsə razı olduğunu bildirib. Bu qərar ABŞ Prezidenti Donald Trampın müharibəni dayandırmaq üçün müdaxilə edəcəyini deməsindən sonra qəbul olunub.

“Dördlük” olaraq tanınan ölkələr ‒ ABŞ, Birləşmiş Ərəb Əmirlikləri, Misir və Səudiyyə Ərəbistanı noyabrın əvvəlində üç aylıq atəşkəsdən sonra sülh danışıqlarına başlanması planını irəli sürüb. Çevik Dəstək Qüvvələri sülh planı ilə razılaşdıqlarını açıqlasa da, dron hücumları ilə Sudan Ordusunun nəzarətində olan ərazilərə hücum edib.

Xatırladaq ki, Sudan Ordusunun rəhbəri general Əbdül Fəttah əl-Bürhan noyabrın 23-də bildirib ki, ABŞ-nin təklifi Çevik Dəstək Qüvvələrinin işğal etdiyi əraziləri özündə saxlamağına şərait yaradır.