Türkiyə Mərkəzi Bankına ilk dəfə qadın sədr təyin edildi

Türkiyə Prezidenti Rəcəb Tayyib Ərdoğan ölkənin Mərkəzi Bankına yeni sədr təyin edib.

Onun sərəncamı ilə Mərkəzi Bankın sədri Şahap Kavcıoğlu vəzifəsindən azad edilib, yerinə Hafize Qaye Erkan təyin edilib.

Qeyd edək ki, Hafize Qaye Erkan Türkiyə Mərkəzi Bankının ilk qadın rəhbəridir. O, 1982-ci ildə Türkiyədə mühəndis-mexanik ata və riyaziyyatçı ananın ailəsində anadan olub. Boğaziçi Universitetini fərqlənmə diplomu ilə bitirən Hafize Qaye Erkan daha sonra təhsilini ABŞ-də davam etdirib. O, hər il yalnız 2 nəfərə verilən “Fəxri doktorluq” təqaüdü müqabilində ev sahibi olmaq, ayda 3 200 dollar məvacib və ABŞ-nin Milli Elmlər Akademiyasından araşdırma üçün qeyri-məhdud büdcə əldə etmək imkanını da qazanıb.

Hafize Qaye Erkan Prinston Universitetində 2 illik doktorantura proqramını 1 ildə bitirərək tarixə düşüb. Bununla da o, ölkənin “ən gənc maliyyə professoru” adını qazanıb. Gənc professor 2005-ci ildə Nyu-Yorkda fəaliyyət göstərən “Goldman Sachs” bankda karyerasına başlayıb. O, adıçəkilən bankda 9 ilə yaxın işləyib, daha sonra isə Birinci Respublika Bankında idarəedici vəzifədə fəaliyyətini davam etdirib və bank vəsaitlərinin 10 dəfəyə qədər artırılmasında böyük rol oynayıb.