Türkiyə-Suriya sərhədində gərginlik pik həddə | 500-ə qədər saxlanılan var

Türkiyə-Suriya sərhədində vəziyyət gərgin olaraq qalır.

Kayseri bölgəsində başlayan etirazlar ölkənin digər ərazilərinə də keçib.

Qaziantepdəki iğtişaşlarda insanlar əllərində bayraqlar ilə küçələrə axışıblar. Onlar bir sıra iş yerləri və şəxsi mülklərə ziyan vurublar. Əraziyə polis əməkdaşları cəlb olunub. Bölgədə məskunlaşan suriyalılardan mağazalarını açmamaqları və bayıra çıxmamaqları tələb olunub. Artıq etirazlar polis tərəfindən yatırılıb.

Ölkənin daxili işlər naziri Ali Yerlikaya da məsələ ilə bağlı sosial media hesabında açıqlama verib. Bildirib ki, bəzi şəhərlərdə suriyalılara qarşı təxribat xarakterli hərəkətlər həyata keçirilib.

Sözügedən hadisələrdən sonra təxribat törətməkdə ittiham olunan 474 nəfər polis tərəfindən saxlanılıb. Nəzarətə götürülən şəxslərdən 285 nəfərin əvvəllər immiqrant qaçaqmalçılığı, xəsarət yetirmə, narkotik alveri, əmlaka ziyan vurma, dələduzluq kimi cinayətlərdən həbs olunduğu müəyyən edilib.

"Əziz vətəndaşlar, təxribata əl atmayaq. Təmkinlə hərəkət edək. Dövlətimiz güclüdür. Dövlətimizə qarşı sui-qəsd edənlər layiq olduğu cavabı alacaqlar”, – deyə nazir açıqlamasında qeyd edib.

Məlumat üçün bildirək ki, etirazlar Kayseri bölgəsində Suriyaəsilli bir şəxsin azyaşlını cinsi qısnamaya məruz qoyması iddiasından sonra başlayıb.

Qeyd edək ki, hazırda sözügedən şəxs saxlanılıb.