Türkiyədə də hiss olunacaq, amma... | Zəlzələdən sonra sunami təhlükəsi

Türkiyənin İzmir şəhərində keçirilən seminarda iştirak edən yaponiyalı zəlzələ mütəxəssisi Yoşinori Morivaki son günlər Egey dənizində baş verən zəlzələləri şərh edib.

O, seysmik aktivliyin davam edəcəyini, bu bölgədə 7 və ya 7,5 bal gücündə zəlzələlərin baş verə biləcəyini deyib.

Mütəxəssis bu gücdə zəlzələnin baş verəcəyi təqdirdə Türkiyədə də hiss olunacağını, lakin ciddi fəsad yaratmayacağını düşündüyünü bildirib.

“Əgər Yunanıstanın Santorini adasında böyük bir zəlzələ baş verərsə, açıq dənizdə orta hesabla 3-5 metr hündürlüyündə sunami yarana bilər. Xəritəyə baxdıqda sunaminin təsiri Santorinidən birbaşa Mərmərəyə çatar. Əgər arada kiçik adalar varsa, bunlar sunaminin şiddətini zəiflədə bilər. Bu səbəbdən sunami baş versə belə, İzmirə qədər çatmayacaq, çünki arada adalar maneə yaradır”, – deyə Y.Morivaki bildirib.

Santorini adasında vulkanik partlayış ehtimalına da toxunan Y.Morivaki belə bir hadisənin Türkiyəyə böyük təsir göstərməyəcəyini, lakin bundan yaranan kül buludlarının ölkəyə çata biləcəyini qeyd edib.