Ukrayna Polşada konsulluq açmağı planlaşdırır

Ukrayna Polşadan silah alışı üçün 120 milyon avro məbləğində kredit istəyib.

Ukraynanın xarici işlər naziri Andrey Sibiqa “Ukrinform”a verdiyi müsahibəsində bildirib ki, bu kredit hesabına Ukrayna Polşadan onların müdafiə sənayesi məhsullarını ala bilər.

A.Sibiqanın sözlərinə görə, Polşa Xarici İşlər Nazirliyi başçısı Radoslav Sikorski ilə görüş zamanı atəşkəsə nail olmaq üçün Rusiya tərəfinə təzyiq göstərmək məqsədilə növbəti addımlar da müzakirə edilib.

“Avropa İttifaqında təsdiqlənmiş 18-ci sanksiya paketimiz var. O, həqiqətən, çox güclüdür. Əsas odur ki, o, ABŞ-nin tətbiq edəcəyi paketlə sinxronlaşdırılsın. Mən trans-Atlantik sanksiya paketini nəzərdə tuturam. Bu sanksiya paketinə Böyük Britaniya, Yaponiya, Yeni Zelandiya, Kanada da qoşulub”, ‒ deyə o qeyd edib.

Həmçinin nazir Ukraynanın ilin sonuna qədər Polşada konsulluq açmağı planlaşdırdığını bildirib.

“Planlarımızda ilin sonuna qədər Ryaşevdə konsulluq fəaliyyətinə başlamaq var. Digər konsulluq müəssisəsi Poznanda açılacaq. Hazırda logistika məsələlərinin həlli və kadr potensialı üzərində aktiv işləyirik”, ‒ deyə A.Sibiqa qeyd edib.