“Vorzakon” Kolbayevə ölümündən sonra yarım milyon dollarlıq zərbə

İki həftə əvvəl xüsusi əməliyyat zamanı öldürülmüş qırğız “vorzakon” Kamçı Kolbayevin yarım milyon dollar dəyəri olan cins atları müsadirə edilib.

Bu barədə Qırğızıstanın Milli Təhlükəsizlik üzrə Dövlət Komitəsinin Mətbuat Xidməti məlumat yayıb.

Bildirilir ki, Kolbayevin əmlakının axtarışı davam etdirilir. Müstəntiqlər dəyəri 500 min dollardan çox olan səkkiz damazlıq at götürüblər. Bunlar əsasən safqanlı cins ingilis atlarıdır.

Qırğız MTN-inin Mətbuat Xidmətindən verilən məlumata görə, cinayət işi çərçivəsində aparılan əməliyyat-istintaq tədbirləri zamanı müsadirə edilən damazlıq atların ən bahalısı “Baş Qaşqa”dır, onun qiyməti 150 min dollardır. Sonrakı “Komandir”, “Roşan” və Donçak” adlanan atların hər birinin qiyməti isə 100 min dollar təşkil edir.

Bundan başqa, Kolbayevin “Kunduz” və “Baytay” adlanan cins atları 50 min dollar dəyərində qiymətləndirilir.

Qeyd edək ki, Kolbayev saxlanılması üçün keçirilən xüsusi əməliyyat zamanı təhlükəsizlik qüvvələrinə müqavimət göstərərkən öldürülüb. Qırğız Prezident Sadır Japarov onun öldürülməsi ilə bağlı araşdırılma aparılması üçün Hərbi Prokurorluğa göstəriş verib.