Yeni kəşf nəzəriyyələri alt-üst etdi | Bu planetdə həyat var?

Kembric Universitetinin tədqiqatçıları ozonun həyatın etibarlı göstəricisi olması ilə bağlı ənənəvi təsəvvürləri şübhə altına alıblar.

Onların araşdırmaları göstərib ki, Veneranın atmosferində bu qazın bioloji proseslər olmadan da yarana biləcəyi mümkündür. Bu da Yer hüdudlarından kənarda həyat axtarışını daha da çətinləşdirir.

Avropa kosmik zondu olan Venus Expressin müşahidələri nəticəsində Veneranın mezosferasında az miqdarda ozon aşkarlanıb. Halbuki planetdə həyatın heç bir əlaməti yoxdur.

Ozonun miqdarı milyonda 0,1-1 hissəcik olsa da, bu fakt elmə mövcud nəzəriyyələri yenidən nəzərdən keçirməyə əsas verir.

“Aydındır ki, Yerdə ozon həyatın göstəricisidir, lakin Venera bu qazın yaranması üçün alternativ yolların da olduğunu göstərir”, ‒ deyə aparıcı tədqiqatçı Robb Kolder izah edib.

Alimlər bütün məlum fotokimyəvi prosesləri təhlil etsələr də, onların heç biri Veneranın atmosferində müşahidə olunan ozon miqdarını tam izah edə bilməyib.

Ənənəvi modellər planetdə realda olduğundan daha çox oksigenin mövcudluğunu tələb edir.

Bu kəşf astrobiologiya üçün mühüm nəticələr doğurur. “Ceyms Uebb” kosmik teleskopundan alınan məlumatlar daha ehtiyatla şərh edilməlidir.