Yerdən 6 dəfə böyükdür | Alimlərin kəşf etdiyi superplanet barədə məlumatlar

Alimlər qalaktikamızda maraq doğuran bir planet aşkarlayıblar.

Dünyadan altı dəfə böyük olan bu superplanetin qayalıqdan ibarət olduğu bildirilir.

“HD 20794d” adlanan bu göy cismi bizim planetimizdən böyük olsa da, Yupiter kimi qaz nəhəngləri ilə müqayisədə nisbətən kiçik kütləyə malikdir.

Daha da önəmlisi bu planet öz ulduz sisteminin yaşana bilən zonasında yerləşir. Bu bölgələrdə maye suyunplanetin səthində mövcud ola biləcəyi ehtimal edilir. Lakin bu superplanet haqqında qəribə bir məqam var.

Planetlər adətən ulduzların ətrafında elliptik və ya oval trayektoriyalar üzrə fırlanır. Bu ellipslər demək olar ki, tam dairəyə yaxındır, lakin heç vaxt tam olaraq dairə formasında olmur.

“HD 20794d”nin isə qəribə bir trayektoriyası var. Onun olduqca elliptik orbitində hər il yaşana bilən zonanın daxili sərhədindən xarici sərhədinə qədər hərəkət etdiyi müəyyən edilib. Bu isə onun həqiqətən yaşana bilən olub-olmaması ilə bağlı suallar yaradır, yaxud bizim bildiyimiz formada həyatın mövcudluğu ehtimalını şübhə altına alır.