Azyaşlının çəkdiyi video ilə bağlı cinayət işi başladıldı

Vətəndaş uşaqların gözü qarşısında narkotik vasitəsindən istifadə edib.

Bu barədə görüntülər sosial şəbəkələrdə yayılıb. İddia edilib ki, həmin şəxs narkotik qəbul edən zaman azyaşlı uşaq onun videosunu çəkib.

Daxili İşlər Nazirliyi uşaqların gözü qarşısında narkotik istifadə edən şəxslə bağlı açıqlama yayıb.

Bildirilib ki, əvvəllər bir neçə dəfə məhkum olunmuş Zaur Şirinov Mingəçevir Şəhər Polis Şöbəsinin əməkdaşları tərəfindən iyun ayında narkotik vasitələrin qanunsuz dövriyyəsinə qarşı keçirilən əməliyyat zamanı şübhəli şəxs qismində saxlanılıb: “Şəxsi axtarış zamanı ondan heroin aşkar edilib. Faktla bağlı Cinayət Məcəlləsinin müvafiq maddəsi ilə cinayət işi başlanılıb. Səsləndirilən iddialar istintaq predmetidir və hazırda da başlanmış cinayət işi üzrə zəruri istintaq hərəkətləri davam etdirilir”.