Biləsuvarda qardaş qardaşı bıçaqlayaraq qətlə yetirdi

Biləsuvarın Xırmandalı kəndində qətl hadisəsi baş verib.

Kənd sakini 39 yaşlı Amil Şirqasımov qardaşı 36 yaşlı Abuzər Şirqasımov tərəfindən qətlə yetirilib.

Hadisə iyunun 17-si gecə saatlarında içki süfrəsi arxasında yaranan mübahisə zamanı baş verib. Bıçaq zərbəsi almış Amil gecə saat 2 radələrində Biləsuvar Rayon Mərkəzi Xəstəxanasına çatdırılsa da, onun həyatını xilas etmək mümkün olmayıb.

Yaxınlarının verdiyi məlumata görə, qardaşlar bir yerdə usta-fəhlə qismində şəxsi sifarişlərlə ev-inşaat işlərində çalışıblar. Daim bir yerdə olan qardaşların arasında münasibətlər kifayət qədər mehriban olub.

Faktla bağlı rayon prokurorluğunda Cinayət Məcəlləsinin 120.1-ci, qəsdən adam öldürmə maddəsi ilə cinayət işi başlanıb. Abuzər Şirqasımov iş üzrə şübhəli şəxs qismində tutulub. Hazırda ibtidai istintaq davam etdirilir.