FHN Şahbuzda əməliyyat keçirdi | Aşkar edilən sursatlar ərazidən kənarlaşdırıldı

Şahbuzda hərbi sursat aşkar edilib.

Fövqəladə Hallar Nazirliyindən verilən məlumata görə, quruma Rayon Polis Şöbəsinin əməkdaşları tərəfindən Badamlı qəsəbəsi ərazisində hərbi sursatın aşkar edilməsi barədə məlumat daxil olub.

Dərhal Naxçıvan Muxtar Respublikası Fövqəladə Hallar Nazirliyinin pirotexnikləri hadisə yerinə cəlb edilib.

Baxış zamanı aşkarlanan sursatın 1 ədəd “F1” əl qumbarası və onun partladıcı hissəsi, 11 ədəd “TOZ-8” markalı tüfəngin mərmisi, 10 ədəd “AK-74” markalı avtomat silahının darağı, 2 ədəd işarə fişəngi, 1 ədəd elektrodetonator, PDM markalı zirehli döyüş maşınına məxsus 1 ədəd optik görmə cihazı, 744 ədəd 7,62 və 313 ədəd 5,45 millimetrlik avtomat mərmisi olduğu müəyyən edilib.

Sursat pirotexniklər tərəfindən zərərsizləşdirilməsi üçün ərazidən götürülərək kənarlaşdırılıb.