İrandan Azərbaycana 50 kq narkotik gətirənlərə zərbə

Cənubi Amerikadan Avropaya, oradan isə Azərbaycana tranzit yolla kokain gətirən dəstə saxlanılıb. Bu haqda Daxili İşlər Nazirliyindən məlumat verilib.

Baş Narkotiklərlə Mübarizə İdarəsinin əməkdaşlarının icra etdiyi əməliyyat zamanı Xalid İsgəndərov, Xəyyam Əsədov və Elman Yusifov saxlanılıblar.

DİN-dən verilən məlumata görə, onlardan 1 kiloqrama yaxın yüksək təsiredici xassəyə malik kokain və 3 284 ədəd ekstazi həbi aşkar olunub. Belə ki, beynəlxalq yükdaşıma fəaliyyəti ilə məşğul olan “TIR” sürücüsü E.Yusifovun bu işdə rolu narkotikləri ölkəyə keçirmək, X.Əsədovun vəzifəsi həmin narkotikləri sərhədyanı zonalardan götürərək X.İsgəndərova çatdırmaq, sonuncunun fəaliyyəti isə narkotik vasitə olan kokainin və ekstazi həblərinin Bakı şəhərində satışını təşkil etmək və əldə olunan “çirkli” pulları ölkə xaricinə çıxarmaq olub.

Araşdırmalar zamanı saxlanılan şəxslərin ölkə ərazisində kokain və ekstazinin əsas tədarükçülərindən olmaları müəyyən edilib. İrandan Azərbaycana narkotik vasitələri qeyri-leqal yollarla göndərən kanallardan daha bir neçəsinə də zərbə endirilib.

DİN-dən bildirilib ki, əməliyyatlar zamanı İrandan ölkəmizə narkotik vasitələri qanunsuz yollarla gətirən daha 5 nəfər – Xəqani Sultanov, Emin Əliyev, Kamil Əliyev, Natiq Aslanov, Vüqar Cəfərov saxlanılıblar. Bu şəxslərdən ümumilikdə 50 kiloqram, o cümlədən 33 kiloqram heroin, tərkibi psixotrop maddələrlə zənginləşdirilmiş 12 kiloqram marixuana, 5 kiloqram metamfetamin, narkotiklərin təmassız dövriyyəsində istifadə etdikləri bank kartları və 210 ədəd psixotrop tərkibli həb aşkar edilib.

Saxlanılanlar İranda yaşayan və Azərbaycan əleyhinə fəaliyyət göstərərək ölkəmizdə narkotiklərin əsasən gənclər arasında geniş yayılmasına can atan şərti adları “Kazım”, “Fəridin” və “Babək” olan şəxslər tərəfindən narkokuryerliyə cəlb olunduqlarını etiraf ediblər.

Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, saxlanılanlar barəsində həbs qətimkan tədbiri seçilib, əməliyyat tədbirləri davam etdirilir.