Nəzrinin həkimi Sənan Mehdiyev hakim qarşısına çıxarılacaq | Detallar açıqlandı

Bakıda burun əməliyyatından sonra vəziyyəti kəskin ağırlaşaraq vəfat edən Nəzrin Mansurlunun ölüm faktı ilə bağlı əməliyyatı həyata keçirən həkim Sənan Mehdiyev saxlanılıb.

“Report”un xəbərinə görə, Sənan Mehdiyev Nəsimi Prokurorluğunda davam edən cinayət işi çərçivəsində şübhəli şəxs qismində saxlanılıb. Onun 48 saat ərzində məhkəmə qarşısına çıxarılması gözlənilir.

S.Mehdiyevə Cinayət Məcəlləsinin səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda maddəsi ilə ittiham verilib.

Qeyd edək ki, 2025-ci il yanvarın 12-də Bakı şəhər sakini, 30 yaşlı Nəzrin Mansurlunun müalicə aldığı xəstəxanada ölməsi faktı ilə bağlı Nəsimi Rayon Prokurorluğunda araşdırma aparılıb. İlkin araşdırma zamanı Nəzrin Mansurlunun yanvarın 3-də paytaxtın Nəsimi rayonu ərazisində yerləşən klinikalardan birində rinoplastika əməliyyatı etdirməsi, əməliyyatdan qısa müddət sonra vəziyyəti kəskin ağırlaşdığı üçün müalicə məqsədilə yerləşdirildiyi xəstəxanada ölməsi müəyyən edilib.