"Qarayara xəstəliyi" diaqnozu təsdiqləndi | Xəstəxanaya müraciət edənlərin sayı artır - Baku TV

Samux rayonunun Alıuşağı kəndindən axşam saatlarından etibarən doqquz nəfər şəxs qida zəhərlənməsi şübhəsi ilə Gəncə Şəhər Birləşmiş Xəstəxanasının nəzdində Abbas Səhhət adına xəstəxananın İnfeksion xəstəliklər şöbəsinə gətirilib. Qida zəhərlənməsi şübhəsi ilə xəstəxanaya gətirilən şəxslərə zəruri tibbi yardımlar göstərilib.

TƏBİB-dən verilən məlumata görə, hazırda onların vəziyyəti kafi qiymətləndirilir. Məsələ ilə əlaqədar AQTA tərəfindən də araşdırmalara başlanıb və qurumun müvafiq şöbələri tərəfindən zəhərlənmənin səbəbləri ilə əlaqədar aparılan araşdırmaların nəticələri ilə bağlı ictimaiyyətə əlavə açıqlamaların veriləcəyi bildirilir.

Qeyd edək ki, hadisə ilə bağlı Səhiyyə Nazirliyi, AQTA və TƏBİB birgə məlumat yayıb.

Məlumatda bildirilir ki, xəstəliyə şübhəli olan ilk şəxsdən götürülmüş müayinə materialının laborator müayinəsi nəticəsində qarayara xəstəliyi diaqnozu təsdiq edilib.

Qeyd olunub ki, hazırda təmasda olan şəxslər müəyyənləşdirilib, tibbi müşahidəyə cəlb edilib və hər hansı dəri yarası olan şəxslərdən laborator müayinələrin aparılması üçün nümunələr toplanılıb. Xəstə heyvanla təmasda olan doqquz nəfər şəxs aşkarlanaraq Gəncə Şəhər Birləşmiş Xəstəxanasının nəzdində Abbas Səhhət adına xəstəxananın Yoluxucu xəstəliklər şöbəsində izolyasiya edilib. Sözügedən şəxslərdən laborator müayinə üçün nümunələr toplanılıb və Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.