"Ruhi xəstədir, tövləmi də yandırıb" | Oğuz sakinləri qorxu içində yaşayırlar

Oğuzun Padar kəndində baş verən hadisə böyük səs-küyə səbəb olub.

Kənd sakini Rövşən Abdullayevin sözlərinə görə, əsəb xəstəliyindən əziyyət çəkdiyi deyilən Ruslan Səmədovun hərəkətləri sakinləri təşvişə salıb. Sonuncu dəfə isə Ruslan Səmədov onun tövləsini yandırıb.

“O, ruhi xəstədir, 15 il əvvəl qoca qarını balta ilə qətlə yetirib. Tövləmi yandırmazdan bir gün öncə atası mənə oğlunun evdən getdiyini söyləyərək onu axtarmaq üçün kömək istədi. Sonra hüquq-mühafizə orqanları gəldi. Onu axtardığım üçün qəsdən tövləmi yandırdı. Nəticədə, mənə 25 min manat maddi ziyan dəyib”, ‒ deyə Rövşən Abdullayev bildirib.

Səhiyyə Nazirliyi Respublika Psixiatriya Xəstəxanasından verilən məlumata görə, Ruslan Səmədov 7 dəfə xəstəxanada stasionar müalicədə olub:

“Sonuncu dəfə 30 yanvar 2025-ci ildə qənaətbəxş vəziyyətdə evə yazılıb. Xəstənin psixi vəziyyətində yenidən pisləşmə müşahidə olunarsa, özünün və yaxınlarının müraciəti ilə Rayon Mərkəzi Xəstəxanasından göndəriş əldə edərək ərazi polisinin köməkliyi ilə Respublika Psixiatriya Xəstəxanasına müraciət edib lazımi müalicələrlə təmin oluna bilər”.

Məsələ ilə bağlı Daxili İşlər Nazirliyindən bildirilib ki, iyulun 30-da Oğuz rayonunun Padar kəndində tövlənin qəsdən yandırılması ilə bağlı daxil olmuş məlumat əsasında ərazi üzrə polis orqanında araşdırmalara başlanılıb və müvafiq ekspertizalar təyin edilib. Polis əməkdaşları tərəfindən keçirilən tədbirlərlə əməli törətməkdə şübhəli bilinən Ruslan Səmədov saxlanılıb. Hazırda fakta görə araşdırmalar davam etdirilir.