Saxlanılan keçmiş banda üzvünün məhkəməsi keçirildi

Hacı Məmmədovun bandasının üzvü olan, silahlı qruplaşmalarda və ya onların törətdikləri basqınlarda iştirak etməkdə təqsirləndirilən Hüseynağa Zərbəliyevin cinayət işinin məhkəmə hazırlıq iclası keçirilib.

Bakı Ağır Cinayətlər Məhkəməsinin hakimi Əli Məmmədovun sədrliyi ilə baş tutan prosesdə təqsirləndirilən şəxsin anket məlumatları dəqiqləşdirilib. Məhkəmə heyəti yerində müşavirə edərək zərərçəkən Tofiq Bayramovun iştirakı olmadan prosesin keçirilməsinə qərar verib. Məhkəmənin baxış iclası martın 29-na təyin edilib.

Qeyd edək ki, Hüseynağa Zərbəliyevə qarşı Cinayət Məcəlləsinin 217.2 – sabit silahlı qruplarda – bandalarda və ya onların törətdikləri basqınlarda iştirak etmə maddəsi ilə ittiham irəli sürülüb.

İstintaqla müəyyən olunub ki, H.Zərbəliyev silahlı qrupun törətdiyi basqında iştirak edərək Tofiq Bayramovun həyatı və səhhəti üçün təhlükəli üsulla fiziki iztirab verməklə onun azadlığını məhdudlaşdırıb.

Xatırladaq ki, Hüseynağa Zərbəliyev 1996-cı ilin iyul ayında Bakı şəhərində əvvəllər tanıdığı Abuzər Abuzərovla birgə paytaxt sakini Tofiq Bayramovu oğurlayıb, onu azadlıqdan məhrum edərək hədə-qorxu yolu ilə külli miqdarda əmlakını mənimsəyib. Onun da üzv olduğu silahlı qrupa Səyyad Allahverdiyev, Qabil Ağayev, Afər Kərimov və qeyriləri daxildir.