11-ci dəfə ölkə çempionu olan “Qarabağ” klubu mükafatlandırılıb

Futbol üzrə Azərbaycan Premyer liqasında 2023/2024-cü illər mövsümünə yekun vurulub.

36-cı turun son matçında çempion “Qarabağ” “Araz-Naxçıvan”la üz-üzə gəlib. “Azərsun Arena”da keçirilən görüşdə azarkeşlər 4 qol görüblər.

Oyunda hesabı Naxçıvan klubu açıb. 3-cü dəqiqədə Elvis Maşike fərqlənib. “Köhlən atlar” 27-ci dəqiqədə Olavio Juninyonun topu ilə tarazlığı bərpa ediblər.

32-ci dəqiqədə “Araz-Naxçıvan”ın kapitanı Vadim Abdullayev avtoqol müəllifi olub. Ağdamlılar fasiləyə 2-1 hesablı üstünlüklə yollanıblar.

İkinci yarıda Naxçıvan təmsilçisi 2-ci topu “Qarabağ”ın qapısından keçirib. 58-ci dəqiqədə Abdulla Rzayev hədəfi dəqiq nişan alıb. “Araz-Naxçıvan” – “Qarabağ”: 2-2.

Bu nəticədən sonra çempion “Qarabağ” xallarının sayını 83-ə çatdırıb. “Araz-Naxçıvan” isə mövsümü 36 xalla 8-ci sırada tamamlayıb.

Qeyd edək ki, sözügedən matçın sonunda “Qarabağ” klubunun mükafatlandırma mərasimi keçirilib. Əvvəlcə komandanın futbolçularına və məşqçilərə medallar verilib. Ardınca Ağdam klubuna çempionluq kuboku təqdim olunub.