AFFA aşağı yaş qrupları üzrə yığmaların baş məşqçilərini açıqladı

14 mart 2025 190 baxış

Martın 14-də SOCAR-ın inzibati binasında AFFA İcraiyyə Komitəsinin növbəti iclası keçirilib.

AFFA-nın prezidenti Rövşən Nəcəfin sədrliyi ilə təşkil olunan toplantının əvvəlində 2025-2026-cı illər mövsümü üçün Premyer Liqaya yüksəlməyə namizəd olan klubların infrastrukturu, maddi-texniki bazası, eləcə də stadionlarda olan mövcud çatışmazlıqlar haqqında məlumat verilib.

İcraiyyə Komitəsi Premyer Liqaya yüksələcək klublara müxtəlif sahələr üzrə çatışmazlıqları aradan qaldırmaq üçün 1 illik möhlət verib.

Daha sonra aşağı yaş qrupları üzrə Azərbaycan milli komandalarının baş məşqçi postuna təyinatlar açıqlanıb. Ayxan Abbasov 21, Elxan Abdullayev 19, İlham Yadullayev 18, Aqil Nəbiyev isə 17 yaşlılardan ibarət yığmanın baş məşqçisi təyin olunub.

İcraiyyə Komitəsi AFFA-nın növbəti Hesabat Konfransının tarixini də müəyyənləşdirib. Bu tədbir 11 aprel 2025-ci il tarixində keçiriləcək.

#SOCAR