AFFA-nın qərarlarından sonra futbolumuzda yeni dövr başlayır

Fevralın 3-ü keçirilən AFFA-nın İcraiyyə Komitəsinin növbəti iclası bir sıra vacib qərarların qəbul edilməsi ilə yadda qalıb.

Toplantıda 2025-26-cı illər mövsümündən etibarən Azərbaycan Premyer Liqasında legioner limitinin ləğv edilməsi, habelə çempionatdakı klubların sayının 12-yə çatdırılması ən diqqətçəkən məqamlardan olub.

AFFA-nın qərarları azarkeşlər və mütəxəssislər arasında müəyyən fikir ayrılığı yaratsa da, çempionatda rəqabətin artmasına töhfə verəcəyini gözləmək olar.

Legioner limitinin ləğv edilməsi yerli futbolçular üzərində də müəyyən təzyiq yaradacaq. Artıq aparıcı klublarımızın heyətində olmaq, eləcə də milliyə dəvət almaq istəyən azərbaycanlı oyunçular hazırlıq prosesinə daha ciddi yanaşmalı olacaqlar. Yekunda bu amil yeni istedadların üzə çıxmasına və yığmamızın güclənməsinə təsir edəcək.

Əcnəbi futbolçular üçün limitin ləğv edilməsindən sonra heyətində yerli oyunçulara üstünlük verən klublara bonusların ödənilməsi ilə bağlı da qərar qəbul edilib. Bu bonuslar legioner rüsumundan əldə ediləcək vəsaitdən veriləcək. Nəticə etibarilə həmin məbləğlər də Azərbaycan futbolunun inkişafına yönəldiləcək.

AFFA-nın 2025-2028-ci illəri əhatə edən inkişaf strategiyasının qəbul edilməsindən sonra isə yaxın perspektivdə futbolumuzda daha ciddi dəyişikliklərin olacağı şübhəsizdir.