Almaniya nəşri Mahir Emrelinin “Nürnberq“i tərk edəcəyinə mövqe bildirib

Almaniyanın "Bild" nəşri Azərbaycan millisinin hücumçusu Mahir Emrelinin mövsümün sonu "Nürnberq"i tərk edəcəyinə mövqe bildirib.

Bir neçə gün öncə 2-ci bundesliqa təmsilçisi 27 yaşlı futbolçu ilə iyunda başa çatacaq müqavilənin uzadılmaması barədə razılığa gəldiyini açıqlayıb.

Yazıda bununla əlaqədar bildirilir ki, son vaxtlara qədər vəziyyət fərqli görünürdü. Tez-tez fərqli davranışları ilə diqqət çəkən Emreli ilə klub arasında bir növ "sevgi münasibəti" başlaya bilərdi.

Son həftələrdə göstərdiyi güclü çıxışlar və son dörd oyunda vurduğu dörd qol səbəbi ilə azərbaycanlı futbolçunun yeni müqavilə imzalayacağı istisna olunmurdu. Onunla klub rəhbərliyi arasında bu barədə danışıqlar da aparılıb. Lakin ortaq razılıq əldə olunmayıb.

Bunun əsas səbəblərindən biri də Emrelinin əvvəlkindən xeyli çox maaş istəməsi olub. Milli komandanın üzvü yayda aldığı zədə ilə kluba qoşulmuşdu və bu səbəbdən "Nürnberq"ə nisbətən ucuz başa gəlmişdi. İndi isə forvard özünü daha yaxşı danışıqlar mövqeyində görür və Bundesliqa klublarından birinə keçmək istəyir.

Şübhəsiz ki, Emreli klubda həmişə yalnız müsbət xəbərlərlə gündəmdə olmayıb. Payızın sonlarına doğru əsas heyətdəki yerini itirdikdən sonra Emreli ilə baş məşqçi Miroslav Klose arasında münasibətlərdə gərginlik yaşanmağa başlamış, məşqlərdə bəzi intizamsız davranışlar da müşahidə olunmuşdu. Bu səbəbdən hücumçu artıq qışda klubu tərk etmək istəyirdi. Lakin Cənubi Koreya klubuna keçidi baş tutmadı. Ancaq mövsümün son mərhələsində futbolçu yenidən performansı ilə inam yaratdı.