Argentinalı futbol ulduzu "Qalatasaray"a gəlir

Heyətində Mauro İkardi, Viktor Osimhen və Mişi Batşuayi kimi ulduzlar olan “Qalatasaray” daha bir məşhur oyunçu ilə güclənəcək.

Türkiyə mediasında yayılan xəbərlərə görə, “sarı-qırmızılar” “Roma”nın liderlərindən Paulo Dibala ilə yaxından maraqlanır.

İddialara görə, Dibalanın meneceri “cim-bom”la razılıq əldə etmək üçün artıq İstanbula gəlib. O, Paulonun Viktor Osimhenlə Mauro İkardinin bu klubda çıxış etməsindən ilhamlandığını və İstanbul təmsilçisinə keçmək istədiyini bildirib.

Transfer baş tutacağı təqdirdə “Qalatasaray” “canavarlar”la müqaviləsi gələn yayadək olan futbolçuya görə 12 milyon avro ödəməli olacaq.

Qeyd edək ki, müxtəlif vaxtlarda İtaliyanın “Palermo” və “Yuventus” klublarında top qovan Paulo 2022-ci ilin yayından “Roma”nın üzvüdür. Paytaxt komandasında 95 matçda 36 qol və 19 məhsuldar ötürmə müəllifi olan Dibalanın əsas uğurları “Yuve” ilə bağlıdır. “Qoca Sinyora”nın forması ilə 293 matçda 115 qola imza atan Paulo A Seriyasında 5, İtaliya kubokunda 4, superkubokda isə 3 dəfə qalib olub.