“Arsenal” - “Bavariya” matçında 4 qol

UEFA Çempionlar liqasında 1/4 final mərhələsinin digər oyunu “Emireyts” stadionunda baş tutub. “Arsenal” - “Bavariya” qarşılaşmasında azarkeşlər 4 qol görüblər.

12-ci dəqiqədə Bukayo Saka topçuları irəli çıxarıb. Lakin “rekordmayster” fasiləyədək vəziyyəti dəyişməyə nail olub. Əvvəlcə Serj Qnabri tarazlığı bərpa edib: 1-1. 32-ci dəqiqədə isə penaltini dəqiq yerinə yetirən Harri Keyn Münhen klubunu irəli çıxarıb. İlk hissə Almaniya təmsilçisinin 2-1 hesablı üstünlüyü ilə yekunlaşıb.

76-cı dəqiqədə İngiltərə klubu hesabı bərabərləşdirməyə nail olub. Leandro Trossard hədəfi dəqiq nişan alıb. Qalan vaxtda başqa qol olmayıb və qarşılaşma 2-2 hesablı bərabərliklə başa çatıb.

Qeyd edək ki, bu komandalar arasında 1/4 final mərhələsinin cavab matçı aprelin 17-si Münhenin “Allianz Arena” stadionunda keçiriləcək.