AVRO-2024-ün daha 3 iştirakçısı məlumdur

AVRO-2024-ün seçmə mərhələsində növbəti görüşlər keçirilib.

Maraqlı oyunlardan birində Sloveniya və Qazaxıstan milliləri final mərhələsinə vəsiqənin sahibini müəyyənləşdiriblər.

Lyublyana şəhərində baş tutan matçda hesabı fasilə ərəfəsində sloveniyalılar açsa da, 2-ci yarının əvvəlində Ramazan Orazov tarazlığı bərpa edib. 1-1.

86-cı dəqiqədə Benyamin Verbiçin qolu isə meydan sahiblərinə qələbə qazandırıb. 2-1 hesabı ilə güclü olan Sloveniya yığması qitə çempionatına vəsiqəni təmin edib.

Final mərhələsinə adlayan daha bir kollektiv Çexiya komandası olub. Moldova seçməsini qəbul edən çexiyalılar Dudera, Xorıy və Souçekin qolları sayəsində 3-0 hesablı qalibiyyət əldə ediblər. Bununla da, E qrupunda xallarının sayını 15-ə çatdıran Çexiya millisi AVRO-2024-də çıxış hüququ əldə edib.

AVRO-2020-nin qalibi İtaliya da Almaniyada keçirilək turnirdə qüvvəsini sınayacaq. Səfərdə Ukrayna futbolçuları ilə qarşılaşan “Skuadra Adzurra” 90 dəqiqə ərzində rəqibin qapısına yol tapa bilməsə də, qolsuz bərabərliklə başa çatan matçın yekununda qitə çempionatına vəsiqəni təmin edib.