Avropa liqası: "Fənərbağça" və "Beşiktaş" növbəti matçlarını keçiriblər

Türkiyənin Avropa liqasındakı təmsilçilərindən “Beşiktaş” bu yarışda növbəti görüşünü Fransa səfərində keçirib.

“Lion”un qonağı olan “qara qartallar” oyundan qalib ayrılıblar.

İlk hissəsi qolsuz yekunlaşan matçda “ağ-qaralar”a qələbəni Jedson Fernandeşin yeganə topu qazandırıb. Yarışda ilk qalibiyyətinə sevinən “Beşiktaş” hazırda turnir cədvəlində 27-ci yerdədir. Baş məşqçi Covanni van Bronkhorstun futbolçuları növbəti turda İsveçin “Malmö” klubu ilə üz-üzə gələcək.

İstanbulun digər komandası “Fənərbağça” isə bu tur “Mançester Yunayted”i qəbul edib. Oyunun ilk hissəsi Kristian Eriksenin qolu sayəsində “qırmızı şeytanlar”ın minimal üstünlüyü ilə bitib. 2-ci yarıya yaxşı başlayan meydan sahibləri 49-cu dəqiqədə tarazlığı bərpa ediblər. Yusuf En-Nesiri fərqlənib. Bundan sonra qapılar qarşısında təhlükəli vəziyyətlər yaransa da, hesab dəyişməyib. “Fənərbağça” – “Mançester Yunayted”: 1-1.

3 görüşdən sonra 5 xalı olan Türkiyə təmsilçisi növbəti matçını Niderlandın “AZ Alkmaar” komandasına qarşı keçirəcək.