Avropa Liqası - "Qalatasaray" və "Beşiktaş" növbəti matçlarını keçiriblər

Türkiyə nəhəngi “Qalatasaray” Avropa Liqasında növbəti matçını İsveç kollektivi “Malmö”yə qarşı keçirib.

6-cı turun oyununda 4 qol vurulub. Hesabı 24-cü dəqiqədə Erik Botheymin qolu ilə meydan sahibləri açıblar. Fasilə ərəfəsində Elyas Yelert tarazlığı bərpa edib: 1-1.

56-cı dəqiqədə Yunus Akgün İstanbul təmsilçisini irəli çıxarsa da, Serxio Penya “Malmö”nü məğlubiyyətdən xilas edib. 2-2 hesabı ilə bitən qarşılaşmadan sonra 12 xalı olan “Qalatasaray” 6-cı yerdədir.

5-ci turda İsrail təmsilçisi “Makkabi”yə məğlub olan “Beşiktaş” bu dəfə Norveç səfərində “Budyo Qlimt”lə üz-üzə gəlib. Qarşılaşma meydan sahiblərinin 2-1 hesablı qələbəsi ilə bitib. “Budyo Qlimt”in heyətində Filip Sinkernagel və Odin Byortuft fərqlənib. “Qara qartallar”ın təsəlli qolu Jedson Fernandeşin aktivindədir. Bu nəticədən sonra 6 xalı olan “Beşiktaş” yarış cədvəlində 28-ci yerdədir.