Avropa liqasında 1/16 finalın cavab oyunları olub

UEFA Avropa Liqasında 1/16 finalın cavab görüşləri keçirilib.

Gecənin böyük maraqla gözlənilən matçı “Old Trafford”da “Mançester Yunayted” və “Barselona” arasında olub. Oyunda hesabı qonaqlar açıblar. Levandovski penaltini dəqiq yerinə yetirib. İlk yarı “blauqrana”nın minimal üstünlüyü ilə başa çatıb.

Fasilədən sonra isə meydan sahibləri dönüş edərək 2 qol vurublar. Əvvəlcə Fred, bir qədər sonra isə Antoni kataloniyalıların qapısına yol tapıb: 2-1.

Komandalar arasında “Kamp Nou”dakı qarşılaşma 2-2 hesabı ilə başa çatdığı üçün “qırmızı şeytanlar” 2 görüşün yekununda 1/8 finala vəsiqə qazanıblar.

Yarışın favoritlərindən “Ayaks” klubu turnirlə vidalaşıb. Berlində “Union”un qonağı olan amsterdamlılar fasiləyə 0-2 hesabı ilə geridə yollanıblar. 47-ci dəqiqədə Kudus toplardan birinin əvəzini çıxsa da, çox keçmədən Duhi 3-cü topu Niderland təmsilçisinin qapısından keçirib. Qalan vaxtda başqa qol olmayıb.

Tərəflər arasında ilk görüş qolsuz bitdiyi üçün 2 oyunun yekununda 3-1 hesablı qələbə qazanan “Union” adını 1/8 finala yazdırıb.