Avropa liqasında 1/4 finalın ilk matçları olub

UEFA Avropa liqasında 1/4 final mərhələsinin ilk matçları keçirilib.

Gərginliyi ilə diqqət çəkən görüşlərdən biri “Mançester Yunayted” və “Sevilya” arasında olub. “Old Trafford” arenasındakı oyunda 4 qol vurulub. Mankunianlar Zabitserin dublu sayəsində ilk hissəni 2-0 hesabı ilə öndə tamamlasalar da, üstünlüyü qoruya bilməyib. Son dəqiqələrdə Malasiya və Maquayrın avtoqollarından sonra tarazlıq bərpa olunub və qarşılaşma 2-2 hesabı ilə yekunlaşıb.

Ötən il Konfrans liqasının finalında “Feyenoord”a qalib gələrək mükafata yiyələnən “Roma” bu dəfə Niderland təmsilçisi ilə bacarmayıb. Rotterdamda baş tutan matçın taleyini Vifferin yeganə qolu həll edib. “Feyenoord” - “Roma”: 1-0.

Eyni hesab “Yuventus” - “Sportinq” görüşündə də qeydə alınıb. “Qoca Sinyora”ya qələbəni qazandıran yeganə qolu 73-cü dəqiqədə Federiko Qatti vurub. “Bayer” və “Yunion” arasında oyun isə sülhlə yekunlaşıb. İki qolun vurulduğu qarşılaşmada Belçika klubundan Bonifasenin topuna leverkuzenlilər Virtsin dəqiq zərbəsi ilə cavab veriblər. “Bayer” - “Yunion”: 1-1.

Qeyd edək ki, Avropa liqasında 1/4 final mərhələsinin cavab görüşləri aprelin 20-si keçiriləcək.