Avropa Liqasında finalçıların adına aydınlıq gəldi

19 may 2023 269 baxış

UEFA Avropa liqasında finalçıların adına aydınlıq gəlib. Turnirin 6 qat qalibi “Sevilya” yarımfinalın cavab matçında “Yuventus”u qəbul edib.

“Ramon Sançes Pisxuan” arenasındakı oyunun əsas vaxtında 2 qol vurulub. Duşan Vlahoviçin topuna meydan sahibləri Susonun dəqiq zərbəsi ilə cavab veriblər: 1-1.

Tərəflər arasında ilk qarşılaşma da bu hesabla bitdiyi üçün əlavə 30 dəqiqəyə ehtiyac yaranıb. Burada isə Erik Lamela “Qoca Sinyora”nın qapısına yol tapıb. Qalan vaxtda müdafiədə diqqətli oynayan “Sevilya” iki görüşün yekununda 3-2 hesabı ilə qalib gələrək tarixində 7-ci dəfə yarışın finalına adlayıb.

Həlledici oyunun digər iştirakçısı Almaniyada müəyyənləşib. “Roma”nı qəbul edən “Bayer Leverkuzen” 90 dəqiqə ərzində “canavarlar”ın müqavimətini qıra bilməyib. Görüş qolsuz bərabərliklə yekunlaşıb. Komandalar arasında ilk qarşılaşma “Roma”nın 1-0 hesablı qələbəsi ilə bitdiyi üçün İtaliya təmsilçisi finala yüksəlib.

#UEFA Avropa liqası