Ayaqları olmayan MMA döyüşçüsü UFC-də çıxış edə bilər

Ayaqları olmayan amerikalı döyüşçü Zion Klark “Gladiator Challenge” təşkilatında Yucin Mürreylə üz-üzə gəlib.

İştirakçıların imkanlarını bərabərləşdirmək məqsədilə əldə olunan razılığa əsasən, Yucin ayaqları və dizləri ilə rəqibin başına zərbə endirə bilməzdi. Qarşılaşmanın favoriti kimi Mürrey göstərilsə də, əlləri ilə məharətlə fəndlər tətbiq edən Klark yekunda görüşün qalibi elan olunub.

Qeyd edək ki, 25 yaşlı Zion Klark son vaxtlar sosial şəbəkə fenomeninə çevrilib. Amma bu mübariz insanın həyat hekayəsi heç də asan deyil. 1997-ci ildə dünyaya gələn Klark uşaq evində böyüyüb. 9 müxtəlif ailə tərəfindən övladlığa götürülən, həmyaşıdları tərəfindən ələ salınan Zionun idmana başlamaq səbəbi özünü müdafiədir. İlk olaraq sərbəst güləşlə məşğul olan Klark tədricən MMA-ə maraq göstərib. Hazırda qarışıq döyüş növlərində qüvvəsini sınayan Zionun əsas hədəfi isə UFC ilə müqavilə imzalamaqdır. O, bununla əlaqədar artıq UFC-yə rəsmi müraciət də ünvanlayıb.