Azərbaycan çempionatı “Sabah” -“Neftçi” matçı

Azərbaycan çempionatında 3-cü turun mərkəzi matçı “Sabah” və “Neftçi” klubları arasında olub.

Avrokuboklarda çıxışını başa vuran komandaların mübarizəsi gərginliyi ilə diqqət çəkib. Hesab 43-cü dəqiqədə açılıb. Boyan Letiç “Sabah”a üstünlük qazandırıb. Fasiləyədək başqa qol olmayıb.

2-ci hissənin əvvəlində tarazlıq bərpa olunub. “Sabah”ın heyətində Con İrasabal avtoqol müəllifi olub. Qalan vaxtda matçın baş hakimi Əliyar Ağayev 12 futbolçuya sarı vərəqə göstərməklə yanaşı, meydan sahiblərinin baş məşqçisi Murad Musayevi birbaşa qırmızı vərəqə ilə texniki zonadan uzaqlaşdırıb. Qarşılaşma isə 1-1 hesabı ilə başa çatıb.

Bu nəticədən sonra “Sabah” 4 xalla 5-ci yerdədir. 3 turdan sonra 2 xalı olan “Neftçi” isə 8-ci pillədə qərarlaşıb.

Turun digər oyununda “Qarabağ” öz meydanında “Araz-Naxçıvan”ı sınağa çəkib. 3 qolun qeydə alındığı görüş “köhlən atlar”ın 2-1 hesablı qələbəsi ilə yekunlaşıb. 6 xalı olan Ağdam təmsilçisi hazırda 3-cü, 3 xal toplayan “Araz-Naxçıvan” isə 6-cı yerdədir.