“Barselona” azarkeşlərini kədərləndirən xəbər

Bir müddət əvvəl mövsümün sonunda “Barselona”dan ayrılacağını açıqlayan Xavi Hernandesin harada işləyəcəyi məlum olub.

Klub rəhbərliyinin onu kollektivdə saxlamaq istəyinə baxmayaraq, Xavi “blauqrana”dan getməyə qərar verib. Son xəbərlərə görə, o, “Milan”ın sükanı arxasına keçəcək.

Belə ki, “Milan”ın hazırkı çalışdırıcısı Stefano Pioli yayda komandanı tərk etməyə hazırlaşır. Klubun sahibinin müşaviri Zlatan İbrahimoviç isə onun yerinə məhz Xavinin gəlməsini təkid edir.

Bildirilir ki, “rossoneri”nin çalışdırıcısı postuna Tomas Tuxel, Unai Emeri və Ruben Amorim kimi məşhur mütəxəssislər də namizəddir.

Qeyd edək ki, 2021-ci ildən “Barsa”da işləyən Xavi doğma klubu ilə ötən mövsüm La liqa və İspaniya superkubokunda qələbə qazanıb. Cari mövsümdə isə komanda o qədər də inamlı təsir bağışlamır.

Çempionlar liqası ilə 1/4 finalda vidalaşan “blauqrana” La liqada lider “Real”dan 11 xal geri qalır.