“Barselona” titullardan məhrum edilə bilər

"Barselona" klubu La Liqa və Çempionlar Liqasından kənarlaşdırıla bilər.

Buna səbəb “Barsa”nın 2016-2018-ci illərdə hakimlər komitəsinin vitse-prezidenti Xose Mariya Enrikes Neqreyraya 1,4 milyon avro ödəniş etməsidir. Klub sözügedən məbləğin Neqreyraya verildiyini etiraf etsə də, bunu gənc futbolçular və hakimlər haqqında hesabatlar üçün ödədiyini iddia edir.

İspaniya mətbuatı məsələni bir qədər də araşdırdıqdan sonra isə məlum olub ki, “Barselona” 2003-cü ildən etibarən adıçəkilən vitse-prezidentə ümumilikdə 4,7 milyon avro ödəyib.

Məsələnin rezonans doğurmasına “Atletiko”da reaksiya verib. Madrid komandasının rəhbərliyi La Liqa klublarına müraciət edərək bu qalmaqalla əlaqədar birgə bəyanat yaymağa səsləyib. Maraqlıdır ki, “blauqrana”nın əzəli rəqibi “Real Madrid” bu bəyanatla bağlı təklifə rədd cavabı verib.